Niedeckens BAP - Startseite

Et ess lang her

Et ess lang her

Ruhsemohndaach, wigg jenooch vun Kölle weg,
drusse schneit et, die Akkorde sinn perfekt
für dat kleine Leed, dat ich dir schrieve will.
Winterlich still.

Sechs Mohnd sinn verjange, dat du vun uns jings.
Sick September stund ich miehstens op ‘ner Bühn.
Kaum en Changs, zo formuliere, wat ich föhl.
Endlich ens still.

Ahm Ruhsemohndaach ‘81 wohr‘t su wigg,
wenn ich mich rääsch erinn‘re, sujar höchste Zick
zozejevve, dat ich stur woor,
selvsjerääsch un arrogant woor,
überheblich, wat du wirklich nit verdeent.

Et ess lang her, verdammp lang her,
dat die Erkenntnis zo ‘nem Leed woot
ess lang her.

Manche Ruhsemohndaach jing sickher enn ‘t Land,
all die Johre woot dat kleine Leed verlangk.
Ejal wo, wenn mir ‘t jespillt hann woorste do,
unfassbar noh.

Enzwesche sinn ming eij‘ne Pänz längs uss ‘m Huus
un et kütt vüür, dat ich manches erkenne muss,
wat ich mir anders vüürjestellt hann,
domohls, als ich noch ahm Ahnfang,
domohls, als du mich erdraare mohts.

Et ess lang her, verdammp lang her,
dat die Erkenntnis zo ‘nem Leed woot
ess lang her.

Ahm Ruhsemohndaach ‘81 wohr ‘t su wigg,
wenn ich mich rääsch erinn‘re, sujar höchste Zick,
zozejevve, dat ich stur woor,
selvsjerääsch un arrogant woor,
überheblich, wat du wirklich nit verdeent.

Et ess lang her, verdammp lang her,
dat die Erkenntnis zo ‘nem Leed woot
ess lang her.


zur Übersicht